Vakin er athygli á Skálhotshátíð, sem hófst 28. júní sl. og stendur til 13. júlí.

Sumartónleikar í Skálholti hafa verið starfandi frá árinu 1975 og staðið fyrir tónleikahaldi í Skálholtskirkju í 5 – 6 vikur á hverju sumri. Hátíðin er sú elsta og jafnframt stærsta sinnar tegundar á landinu og einn stærsti menningarviðburður sem fram fer á Suðurlandi yfir sumartímann. Á hverju sumri sækja á þriðja þúsund manns Sumartónleikana.

Eitt helsta markmið Sumartónleika í Skálholti er að stuðla að nýsköpun íslenskrar tónlistar. Tónverkin sem frumflutt hafa verið á hátíðinni nálgast 200, og hafa flest helstu tónskáld Íslands komið þar við sögu. Margir af þekktustu tónlistarflytjendum þjóðarinnar hafa einnig komið að starfi Sumartónleikanna á starfsferli sínum, og fjölmargir virtir erlendir flytjendur hafa sótt Sumartónleika heim. Hátíðin hefur skapað sér sess sem mikilvæg tónlistarhátíð langt út fyrir landsteinana, sérstaklega hvað varðar flutning á tónlist 17. og 18. aldar.

Eitt af markmiðum Sumartónleikanna er að vera vettvangur fyrir hljóðfæraleik á upprunaleg hljóðfæri og er Bachsveitin í Skálholti meðal hópa sem hafa skipað fastan sess í tónleikahaldi Sumartónleikanna.

(Upplýsingar frá https://www.sumartonleikar.is/um)

Það var Helga Ingólfsdóttir, semballeikari, sem stofnaði til þessarar hátíðar fyrir 50 árum. Á dagskrá eru m.a tónleikar franska semballeikarans, Jean Rondeau, með franskri barokktónlist. Þessir tónleikar eru til minningar um Helgu og styrktir af Minningarsjóði um hana.

Sjá nánar:
https://www.sumartonleikar.is/
https://www.sumartonleikar.is/?lang=en