Styrkþegar félagsins

Richard Wagner reisti og hannaði, eins og kunnugt er  sérstakt óperuhús, Festspielhaus í Bayreuth, til flutnings verka sinna. Þar er á hverju sumri haldin óperuhátíð og er gífurleg eftirspurn eftir miðum á hana, enda koma þarna fram fremstu listamenn heims á sviði tónlistar og óperusviðssetninga.

Það var í Bayreuth, sem hugmyndir Wagners fullkomuðust um óperuhús, sem skilað gæti verkum hans í þeirri umgjörð sem hann sá fyrir sér. Auk þess taldi hann að staðsetning hússins í þessum litla bæ, fjarri skarkala heimsins, veitti óperugestum þá ró og einbeitingu sem þyrfti til að geta notið verkanna og skilið þau til fulls.

Richard Wagner hafði í raun hugsað sér Bayreuthhátíðina sem hátíð fólksins eða almennings, líkt og tíðkaðist 2000 árum áður í Grikklandi. Í samræmi við þetta vildi hann ekki hafa neinn aðgangseyri að hátíðinni. Þegar þessi sýn hans gekk ekki upp, af augljósum fjárhagsástæðum, varð sú hugmynd til að a.m.k. fámennum hópi útvaldra yrði boðið frítt á hátíðina. Frá árinu 1882 hefur Richard Wagner Stipendienstiftung í Bayreuth, sem Wagner kom sjálfur á fót, haft það sem aðalmarkmið að stuðla að því að ákveðnum hópi ungra tónlistar- og sviðslistarmanna sé gert kleift að sækja Bayreuthhátíðina. Fjármögnun þessarar fallegu hugmyndar meistarans liggur nú að mestu hjá Wagnerfélögum víða um heim, en fyrrgreind stofnun heldur utan um fyrirtækið.

Á undanförnum árum hafa 250 styrkþegar sótt hátíðina heim. Flestir, eða nálægt 190, koma frá þýskum Wagnerfélögum, 36 frá öðrum félögum í V-Evrópu, en afgangurinn frá A-Evrópu eða annars staðar frá.

Richard Wagner félagið á Íslandi hefur í tuttugu ár styrkt ungan íslenskan tónlistar- eða leiklistarmann til að sækja Wagnerhátíðina í Bayreuth.

Styrkveiting félagsins felst í því að það leggur fram ákveðið framlag til Richard Wagner Stipendienstiftung í Bayreuth og fær í staðinn að senda Íslending á hátíðina. Sá sem fyrir valinu verður fær í sinn hlut án endurgjalds:

  1. Miða á sýningar á þrem Wagneróperum
  2. Ef til vill möguleiki á að syngja á sérstökum styrkþegatónleikum.
  3. Aðgang að undirbúningsfyrirlestrum á sýningarnar.
  4. Leiðsögn um Richard Wagner og Franz Liszt safnið í Bayreuth.
  5. Leiðsögn um Festspielhaus.
  6. Leiðsögn um borgina Bayreuth
  7. Sameiginlegan hádegisverð styrkþeganna alla dagana.
  8. Styrkþegaveisla.

Tekið skal fram að auk þess, sem styrkþegi fær að njóta án endurgjalds samkvæmt ofangreindu, þá er höfð milliganga um að útvega gistingu án endurgjalds.

Menntamálaráðuneytið hefur á undanförnum árum veitt Richard Wagner félaginu styrk, sem styrkþegar hafa fengið upp í ferðakostnað.

Styrkþegar hafa verið:

Ártal Nafn Listgrein
2012 Herdís Anna Jónasdóttir sópransöngkona
2010 Júlíus Karl Einarsson baritónsöngvari
2011 Víkingur Heiðar Ólafsson píanóleikari
2009 Daníel Bjarnason hljómsveitarstjóri og tónskáld
2008 Þorvaldur Þorvaldsson bassasöngvari
2007 Egill Árni Pálsson tenórsöngvari
2006 Þóra Einarsdóttir sópransöngkona
2006 Elísa Vilbergsdóttir sópransöngkona
2005 Helga rós Indriðadóttir sópransöngkona
2004 Jóhann Friðgeir Valdimarsson tenórsöngvari
2003 Davíð Ólafsson bassasöngvari
2002 Jónas Guðmundsson tenórsöngvari
2001 Árni Heimir Ingólfsson tónlistarfræðingur og píanóleikari
2000 Tómas Tómasson baritónsöngvari
1999 Bjarni Thor Kristinsson bassasöngvari
1998 Anna Margrét Magnúsdóttir tónlistarfræðingur og semballeikari
2013 Guja Sandholt messósópransöngkona
2014 Kristján Jóhannesson baritónsöngvari
2015 Þorleifur Örn Arnarson leikstjóri
2016 Oddur Arnþór Jónsson baritónsöngvari
2017 Valdís Gregory sópransöngkona
2018 Agnes Thorsteins messósópransöngkona
2018 Hrafnhildur Árnadóttir Hafstað sópransöngkona
2019 Bryndís Guðjónsdóttir sópransöngkona